ՆԱԶԱՐՅԱՆ Տիգրան Հակոբջանի. ծնվել է 1858 թվականի սեպտեմբերի 29-ին: Խմբագիր, հրատարակիչ, հասարակական գործիչ: Սովորել է Շուշիի Գալուստ Փափազյանի մասնավոր դպրոցում: 1879-ին Շուշիում հիմնել է հրատարակչական գրասենյակ: 1881-ին տեղափոխվել է Թիֆլիս, հրատարակել «Աղբյուր» մանկապատանեկան ամսագիրը, «Տարազ» շաբաթաթերթը՝ հավելվածներով, «Կովկասի առավոտ» (1907) և այլ թերթեր, ինչպես նաև գրքեր, օրացույցներ, տարեցույցներ, ժողովածուներ: Հեղինակ է պիեսների («Ճըպատըդ քոլադ կտրի», 1887, «Արոզա», 1913, և այլն), ակնարկների, հրապարակախոս, հոդվածների: 1907-ին գրականագետների, արվեստագետների և խաղաղության միջազգային ընկերակցության Լիսաբոնում կազմակերպված ցուցահանդեսում ներկայացրել է 5-րդ դարի հայ պատմիչների հրատարակված գործերը, ընտրվել այդ կազմակերպության պատվավոր անդամ: 1915-ին Թիֆլիսում բացել է «Հրատապ սփոփանք մայր հայաստանցիներին» որբախնամ ապաստանը, «Վասպուրական դպրոց» մանկապարտեզը: 1919-ին մեկնել է Եվրոպա, թղթակցել «Ապագա» (Փարիզ) և  այլ թերթերի, հրատարակել է «Թիքա» գրական երկերի ժողովածուն (1922, Լայպցիգ): 1925-ին վերադարձել է հայրենիք, կազմակերպել Ղարաբաղի օգնության կոմիտե՝ ջանալով նպաստել Ղարաբաղի վերաշինությանը: Մահացել է 1926 թվականի սեպտեմբերի 14-ին Թիֆլիսում: 

Գրականության ցանկ

«Ով ով է: Հայեր» հանրագիտարան, հատոր երկորդ, գլխ. խմբ. Հովհ. Այվազյան, Հայկական հանրագիտարան հրատ., Երևան, 2007:

Երկ. Խօսք եւ գործ, Թ., 1914: 

Գրկ Նազարյան Ս., Տիգրան Նազարյանի կյանքը և. գործունեությունը, «Տեղեկագիր ՀՍՍՀ ԳԱ, հասարակական գիտություններ », 1965, № 3: 

Տիգրան Նազարյանի նամակները Կոստանդին Մելիք-Շահնազարյանին. ԼՀԳ, 1991, N 4:

 

 

ՀՀ, ք. Երևան, Ալեք Մանուկյան 1,
ԵՊՀ 2-րդ մասնաշենք, 5-րդ հարկ,
Հեռ.` + 37460 71-00-92
Էլ-փոստ` info@armin.am

Բոլոր իրավունքները պաշտպանված են: Կայքի նյութերի մասնակի կամ ամբողջական օգտագործման, մեջբերումների կատարման դեպքում հղումը պարտադիր է` www.armenianlanguage.am