ՊԵՐՊԵՐՅԱՆ Ռեթեոս Հակոբի ծնվել է 1848 թվականի հոկտեմբերի 10-ին Կ. Պոլսի Խասգյուղ թաղամասում: Բանաստեղծ, մանկավարժ, հրապարակախոս, տնտեսագետ: Օ. Ռ. և Շ. Ռ. Պերպերյանների հայրը: Ավարտել է Կ. Պոլսի Ներսեսյան վարժարանը (1866), զբաղվել ուսուցչությամբ: 1876-ին հիմնել է Պերպերյան վարժարանը: Պերպերյանի «Առաջին տերեւք» (1877), «Խոհք եւ յուշք» (1904) ժողովածուները կրում են ֆրանսիական ռոմանտիզմի ազդեցությունը: Անդրանիկ բանաստեղծությունները սիրո և բնության երգեր են, վերջին շրջանի գործերում իշխում է փիլիսոփայական խոհը:

Պերպերյանի մանկավարժաբարոյագիտական հայացքները («Դաստիարակի մը խօսքերը», 1901, «Դպրոց եւ դպրութիւն», 1907) հիմնված են գեղեցիկի, բարու և ճշմարիտի սկզբունքների վրա: Կարևորել է կնոջ դերը հասարակության մեջ: Ըստ նրա՝ բարոյական դաստիարակության ամենազորեղ միջոցը դաստիարակի անձնական օրինակն է: Պերպերյանը գրել է նաև հրապարակախոսաական-փիլիսոփայական աշխատություններ: Տնտեսագիտական հիմնական խնդիրներին մոտեցել է դասական քաղաքատնտեսության դիրքերից: Հարստության ստեղծման, ապրանքի արժեքի, փողի մասին դատել է՝ ելնելով արժեքի աշխատանք, տեսության սկզբունքներից: Վերլուծելով աշխատավարձի էությունը՝ աշխատավորի համար գլխավորը համարել է իրական աշխատավարձը և այն անմիջականորեն կապել կենսամիջոցների գների հետ: Կապիտալը բնորոշել Է որպես «խնայված» հարստություն և ոչ թե շահագործման արդյունք:

Հանդես է եկել նան Հրաչյա կեղծանունով: 

Մահացել է 1907 թվականի ապրիլի 7-ին Կ. Պոլիսում: 

Գրականության ցանկ

«Ով ով է: Հայեր» հանրագիտարան, հատոր առաջին, գլխ. խմբ. Հովհ. Այվազյան, Հայկական հանրագիտարան հրատ., Երևան, 2007:

Երկ. Երկու բանախօսութիւնք, ԿՊ, 1880: 

Համառօտ քաղաքական տնտեսութիւն..., ԿՊ, 1883: 

Դրամ, ԿՊ. 1886:

Գրկ. Կարապետյան Պ, Մեծ դաստիարակ և ուսուցչապետ Ռեթէոս 3. Պէրպէրեան [ԿՊ, 1933): 

Թեվոսյան Ա., Ռեթեոս Պերպերյան: Փիլիսոփայական և հասարակական-քաղաքական հայացքները, Ե., 1989:

 
ՀՀ, ք. Երևան, Ալեք Մանուկյան 1,
ԵՊՀ 2-րդ մասնաշենք, 5-րդ հարկ,
Հեռ.` + 37460 71-00-92
Էլ-փոստ` info@armin.am

Բոլոր իրավունքները պաշտպանված են: Կայքի նյութերի մասնակի կամ ամբողջական օգտագործման, մեջբերումների կատարման դեպքում հղումը պարտադիր է` www.armenianlanguage.am